Прадстаўнікі Дзятлаўскага цэнтра турызма і краязнаўства дзяцей і моладзі завіталі да вучняў Казлоўшчынскай, Вензавецкай і Хвінявіцкай школ з незвычайнай выставай “Аўтобус Перамогі”, каб расказаць пра подзвігі “дзяцей вайны” і правесці ўрок патрыятызму.
Як адзначыў дырэктар цэнтра Дзмітрый Радзіеўскі, галоўная ідэя экспазіцыі — расказаць дзецям пра гераізм іх равеснікаў у гады Вялікай Айчыннай вайны, пра тое, як рана ім давялося пасталець і якія цяжкасці перажыць.
– Хочацца, каб яны з ранніх гадоў ведалі, якой жудаснай бывае вайна, і што дапусціць яе паўтарэння ні ў якім разе нельга, – падкрэсліў Дзмітрый Лявонцьевіч.
Выстава складалася з трох частак. Галоўнай з іх стала мабільная экспазіцыя ў аўтобусе-музеі, зазірнуўшы ў які дзеці маглі паглядзець на фотаздымкі герояў вайны, іх медалі, абмундзіраванне, зброю і асабістыя рэчы. Побач з аўтобусам размясціўся стэнд з фотаздымкамі “дзяцей ліхалецця” – выхаванцаў міжнароднага піянерскага лагера пры санаторыі “Наваельня” і Дзятлаўскага прытулку. Асаблівую цікавасць выклікала гісторыя Джыма Камагорава – сына аргенцінскага камуніста і выхаванца лагера, якому, нягледзячы на голад, холад і цяжкія ўмовы жыцця падчас вайны, удалося выратавацца і пражыць доўгае жыццё. Вядома, што пасля вайны ён пераехаў у Расію, стварыў сям’ю, зняўся ў некалькіх фільмах і да канца жыцця вёў перапіску з новаяльнянскімі краязнаўцамі.
Трэцяй часткай экспазіцыі сталі VR-акуляры, праз якія дзеці маглі паглядзець на 3D-панараму гісторыка-краязнаўчага музея “Дзеці ліхалецця”, які працуе ў Новаяльнянскай сярэдняй школе.
Анастасія Гушча, 6 клас Казлоўшчынскай сярэдняй школы:
– Мне спадабаўся фармат музея, і менавіта тое, што музей прыехаў да нас сам. Гэта незвычайна, зручна. Падчас экскурсіі мы даведаліся больш пра гісторыю нашай Радзімы, змаглі паглядзець і нават дакрануцца да музейных экспанатаў, убачыць як жылі нашы бабулі і дзядулі.
Максім Баравік, 10 клас Казлоўшчынскай сярэдняй школы:
– Дзякуючы экскурсіі мы змаглі паўтарыць тое, што ўжо ведалі, і пашырыць кругагляд. Было вельмі цікава ўбачыць зброю, якая прадстаўленае на выставе, паглядзець на фотаздымкі, якія засталіся з часоў вайны.
Аляксей Шалесны, 9 клас Казлоўшчынскай сярэдняй школы:
– Было карысна “асвяжыць” веды, атрыманыя на ўроках гісторыі, паўтарыць усё тое, што мы ўжо ведалі і даведацца нешта новае.
Марына Нячай, дырэктар Хвінявіцкага дзіцячага сада-сярэдняй школы:
– Мы рады, што сёння ў нашу школу завітаў “Аўтобус Перамогі”. Лічу, што дзеці павінны памятаць подзвігі дзядоў і прадзедаў, якія не шкадавалі свайго жыцця, каб у наступных пакаленняў над галавой заўсёды было мірнае неба. Менавіта таму, на мой погляд, добрым рашэннем было расказаць школьнікам гісторыі пра аднагодкаў, якія сутыкнуліся з жахамі фашызму.
Марыя ПАПОВА